Грекийн Салоники хотын ойролцоох хогийн саванд орхисон 2000 гаруй жилийн настай гантиг хөшөө уутанд боолттой хэлбэрээр олдсон талаар цагдаагийн алба Пүрэв гаригт мэдээлсэн байна.

Грекийн хоёр дахь том хот Салоники хотын гадна орших Неои Эпиватес дахь хогийн савны хажууд нэгэн оршин суугч 80 см (31 инч) толгойгүй хөшөө олжээ. Тэр хүн үүнийг нутгийн эрх баригчдад шилжүүлсэн бөгөөд тэд археологчидтой холбогдож, хөшөөний ач холбогдлыг нь үнэлжээ.

Мэргэжилтнүүд анхны үнэлгээний дагуу уг бүтээлийг МЭӨ 320-30 оны хооронд буюу Агуу Александрын байлдан дагуулалтын дараа урлаг, соёлын цэцэглэн хөгжиж байсан үе болох эллинизмын эрин үеийнх  болохыг тогтоосон гэж байна.

Хөшөөг археологичид нэмэлт шинжилгээнд оруулахаар нийслэл Афин хотын археологийн төв рүү илгээжээ. Цаашид хөшөөг хадгалах, судлахаар орон нутгийн эртний дурсгалт газарт хүлээлгэн өгөх юм. Цагдаа нар хөшөөг хэн хаясныг тогтоохоор мөрдөн байцаалтын ажиллагаа эхлүүлж, нэгэн сэжигтнээс байцаалт авахаар хэсэг хугацаанд саатуулж, дараа нь ямар ч ноцтой зүйл илрээгүйн учир сулласан байна.

Эртний өв уламжлалаараа алдартай Грек улсад санамсаргүй археологийн олдворууд олдох нь харьцангуй түгээмэл байдаг бөгөөд ихэвчлэн барилга барих, нийтийн ажил хийх явцад олддог. Арванхоёрдугаар сард Афины ойролцоо байгалийн хийн хоолой тавьж байсан ажилчид Акрополисын ойролцоох тоосгоны доторлогоотой нүхнээс Ромын эзэн гүрний үеийн Гермесийн хөшөө олсон байна. Салоники хот хэдэн арван жил үргэлжилсэн метроны бүтээн байгуулалтын явцад олдсон эртний олдворуудыг өнгөрөгч оны  арваннэгдүгээр сард албан ёсоор үзэсгэлэн болгож олон нийтэд нээлттэй үзэсгэлэн болгон үзүүлсэн юм. Археологичид гантиг чулуугаар хучигдсан Эртний Ромын эзэн гүрний зам, Эртний Грек, Визант, Османы эзэн гүрний үеийн хэдэн арван мянган олдворууд одоо ч Салоники хотоос олдсон хэвээр байгаа билээ.