АНУ-ын Харвардын их сургуулийн Хуулийн сургуулийн төгсөгч, нэрт хуульч Морган Чу болон түүний эхнэр Хелен Чу нар тус сургуульд 31.4 сая ам.доллар хандивлажээ. 

Энэ нь Харвардын хуулийн сургуулийн түүхэнд нэг удаад өгсөн хамгийн өндөр дүнтэй хандив болж байна. Харвардын хуулийн сургуулиас 2026 оны аравдугаар сарын 25-нд мэдээлснээр, уг хөрөнгөөр зургаан шинэ профессорын орон тоог урт хугацаанд санхүүжүүлэх тусгай сан байгуулна. Ингэснээр чадварлаг эрдэмтэн, багш нарыг татах, судалгаа шинжилгээ болон сургалтын чанарыг дээшлүүлэх тогтвортой санхүүгийн эх үүсвэр бүрдэх юм.

Морган Чу нь 1976 онд Харвардын хуулийн сургуулийг онц дүнтэй төгссөн бөгөөд оюуны өмчийн эрх зүйн чиглэлээр АНУ-д нэр хүндтэй хуульчдын нэг юм. Тэрбээр 1977 онд Irell & Manella хуулийн фирмд ажилд орж, 1982 онд тус фирмийн түнш болжээ. Өдгөө тус фирмийн шүүхийн маргаан хариуцсан багийг удирдаж байна.

Морган Чу хандивынхаа талаар: “Намайг андуурч элсүүлсэн Харвардын хуулийн сургуульд би талархдаг. Энд би дэлхийн түвшний боловсрол эзэмшиж, бас гайхалтай сайхан цаг хугацааг өнгөрүүлсэн. Хелен бид хоёр зүгээр л ‘Баярлалаа’ гэж хэлэхийг хүссэн юм” хэмээн хошигнон ярьжээ.

Харвардын хуулийн сургуулийн декан Жон Голдберг энэхүү хандив нь дэлхийн шилдэг багш, судлаачдыг дэмжиж, дараагийн үеийн хуульчид болон манлайлагчдыг бэлтгэхэд чухал хувь нэмэр оруулна гэдгийг онцолсон байна. Морган, Хелен Чу нар өмнө нь ч тус сургуульд олон удаа хандив өргөж, профессорын санхүүжилт, сурлагын амжилтын шагнал, санхүүгийн хэрэгцээнд суурилсан оюутны тэтгэлэг болон эрдэм шинжилгээний хөтөлбөрүүдийг дэмжиж иржээ.

Тухайлбал, 2013 онд тэдний өгсөн хандивын хөрөнгөөр сургуулийн деканы албан тушаалын санхүүжилтийн байнгын сан байгуулсан байна. Түүнчлэн Харвардын хуулийн сургуулийн хувьд 2026 оны санхүүгийн жил хандив цуглуулалтын түүхэн дээд амжилт тогтоосон жил болжээ. Тус сургууль нийт 135 сая гаруй ам.долларын хандив төвлөрүүлсэн нь өмнөх дээд амжилтаас бараг 30 сая ам.доллароор давсан үзүүлэлт юм. Эдгээр хөрөнгийг сургалтын төлбөр төлөх боломж хязгаарлагдмал оюутнуудыг дэмжих, тэтгэлэг олгох, профессорын санхүүжилт болон судалгааны хөтөлбөрүүдийг өргөжүүлэхэд зарцуулах аж. Ийнхүү Харвардын хуулийн сургуулийн төгсөгчдийн хандив нь зөвхөн оюутнуудад тэтгэлэг олгохоор хязгаарлагдахгүй, багшлах боловсон хүчнийг урт хугацаанд санхүүжүүлэх, боловсролын чанарыг тогтвортой хадгалахад чиглэж байгаагаараа онцлог юм.

Эх сурвалж: Harvard Law School, 2026.10.25