Ардчилсан нам УИХ-ын дарга С.Бямбацогтыг Засгийн газраас өргөн барьсан 2027 оны төсвийн төслийг хүлээн авахдаа Үндсэн хууль зөрчсөн байж болзошгүй гэж үзэн Үндсэн хуулийн цэцэд хандахаар шийдвэрлэжээ.

Ингэснээр улс төрийн гол маргаан 2027 оны төсвийг тойрон өрнөхөөр байна. Төсвийн төслийг хэлэлцэх үеэр УИХ-ын гишүүд зарлага, алдагдал, хөрөнгө оруулалтын хуваарилалт болон урсгал зардлын өсөлтөд байр сууриа илэрхийлж эхэлжээ.

Эрх баригч МАН дотооддоо ойлголцсон гэх мэдээлэл байгаа ч төсвийн хэлэлцүүлгийн үеэр гишүүдийн зөрчил илүү тодорхой болох хүлээлттэй байна. Мөн Засгийн газрын тогтвортой байдал, төсвийн хөрөнгө оруулалтын хуваарилалттай холбоотой улс төрийн тохироо эрчимжиж болзошгүй юм. Энэ удаагийн хэлэлцүүлгээр гишүүд төсвийн зарлагыг бодитоор танах эсэх, хувийн хэвшлийг дэмжих бодлого баримтлах уу, эсвэл тойрогт чиглэсэн хөрөнгө оруулалтыг нэмэгдүүлэх үү гэдэг нь анхаарлын төвд орно. Эрх баригчдын төлөвлөснөөр төсвийн тодотголыг долоо хоногийн дотор хэлэлцэн баталж, ээлжит бус чуулганыг хаах төлөвтэй байна. Харин УИХ-ын намрын ээлжит чуулганыг есдүгээр сарын 15-нд эхлүүлэхээр зэхэж буй гэх мэдээлэл байна. АН төсвийн тодотгол болон 2027 оны төсвийн төслийн хэлэлцүүлэгт эрх баригчдын байр суурийг дагах уу, эсвэл хүчтэй сөрөх үү гэдэг нь ирэх өдрүүдэд тодорхой болно.