Чуулганы нэгдсэн хуралдаан 10.00 цагт эхэлсэн.

АН-ын хурлууд давхцаж, Үндэсний бодлогын хороо нь өнөөдөр үргэлжлүүлэн хуралдаж байгаатай холбоотойгоор УИХ-ын гишүүн Х.Тэмүүжин парламентын дархлаа, ардчиллыг хангах хүрээнд гишүүдийн ирцийг сайжруулахаар 1 хоногийн завсарлага хүслээ.

Улмаар УИХ-ын дарга С.Бямбацогт уг хүсэлтийг хангаж, Ерөнхийлөгчийн санаачилсан УИХ-д нэмэлт, өөрчлөлт оруулахтай холбоотой хуулийн төслийн санал хураалт ирэх долоо хоногийн пүрэв гараг хүртэл хойшиллоо.

Хуралдаан АН-ын бүлэггүйгээр үргэлжилж, өнгөрсөн хугацаанд анхны хэлэлцүүлэг явуулсан хуулийн төслүүдийг үзэл баримтлалын хүрээнд дэмжих эсэхэд санал хурааж байна. Одоогоор татгалзаж шийдвэрлэсэн тохиолдол байхгүй. Ихэнх гишүүний дэмжсэнээр дараагийн хуралдаанд бэлдүүлэхээр холбогдох байнгын хороодод шилжүүлж байна.

УИХ-ын тухай хуульд нэмэлт, өөрчлөлт оруулах тухай Х.Тэмүүжин тэргүүтэй гишүүний санаачилсан, Ерөнхийлөгчийн санаачилсан 2 тусдаа хуулийн төсөл байгаа.

Үүний нэг нь дээр дурдсанчлан санал хураалтыг хойшлуулсан бол нэгийг нь дэмжлээ. Х.Тэмүүжин тэргүүтэй гишүүний санаачилсан хуулийн төсөл нь дэмжигдлээ.

Үргэлжлүүлэн Улсын Их Хурлын гишүүн Н.Алтаншагай нарын 21 гишүүн 2025.12.12-ны өдөр өргөн мэдүүлсэн Гадаад зээллэгийн ашиглалт, үр ашгийг нэмэгдүүлэх тухай хуулийн төсөл, анхны хэлэлцүүлэг өрнөж байна.

Үүнээс гадна тов ёсоор дараах асуудлыг хэлэлцэнэ.

• “Тогтоолд нэмэлт оруулах тухай” Монгол Улсын Их Хурлын тогтоолын төсөл /Засгийн газар, 2026.03.19-ний өдөр өргөн мэдүүлсэн, эцсийн хэлэлцүүлэг, асуулт асуух хугацаа 60 минут/
• Аж ахуйн нэгжийн орлогын албан татварын тухай хуульд нэмэлт оруулах тухай /Улсын Их Хурлын гишүүн П.Сайнзориг, Б.Бат-Эрдэнэ нар 2026.03.19-ний өдөр өргөн мэдүүлсэн, хэлэлцэх эсэх, асуулт асуух хугацаа 120 минут/
• Төрийн нууцын тухай хууль /Шинэчилсэн найруулга/-ийн төсөл болон хамт өргөн мэдүүлсэн хуулийн төслүүд /Засгийн газар 2026.03.18-ны өдөр өргөн мэдүүлсэн, хэлэлцэх эсэх, асуулт асуух хугацаа 120 минут/
• Төрийн нууцын жагсаалт батлах тухай хуулийн төсөл /Засгийн газар 2026.03.18-ны өдөр өргөн мэдүүлсэн, хэлэлцэх эсэх, асуулт асуух хугацаа 120 минут/
• “Хянан шалгах түр хороо байгуулах тухай” Улсын Их Хурлын тогтоолын төсөл /Улсын Их Хурлын гишүүн Ж.Баярмаа нарын 40 гишүүн 2025.10.10-ны өдөр өргөн мэдүүлсэн, үргэлжилнэ/