Ерөнхий сайдын зөвлөх Ч.Болортуяа МАН-ын бүлгийн бага хурлын талаар мэдээлэл өглөө. Түүний дурдсан гол асуудлыг товчлон хүргэе.

1. Бага хуралд үг хэлсэн 40 гаруй хүний үгнээс хамтарсан Засгийн газар нь улстөрийн намын хувьд өрсөлдөгч улстөрийн хүчнээ бэхжүүлж байгаа талаар дурдсан. Тиймээс энэхүү жил орчим хуримтлагдсан асуудлаа шийдэнгээ ЕС-ын асуудлыг шийдээд авъя гэх зорилготой байсан.

2. ЕС-ын бүрэн гүйцэт хариулт:

• Миний хүүгийн асуудлыг хуулийн байгууллага шалгаад хариу нь гарах байх аа. Миний хувьд орлогоо нотолно. Орлогоо нотлох ёстой гэсэн залуусын шаардлагад хүндэтгэлтэй хандаж байгаа. Ийм эргэлзээтэй асуудал үүсгэсэндээ олон нийтээс уучлалт гуйсан. Намын нөхдөөсөө ч уучлалт гуйж байна. Хувь хүний асуудалд та бүхэн эргэлзэх хэрэггүй, үнэн мөнөөрөө тогтоогдоод гараад ирнэ.
• Б.Баатар найруулагчийн тухайд энэ хүн миний төрсөн ах нь үнэн харин Ерөнхийлөгч асан Х.Баттулгатай холбоо, хамааралтай гэж намайг ярьдаг яриа бол домог.
• Би Бэрхэд нүүж очсон цагаас хамар хашааны, нэг ангийн охинтойгоо гэр бүл болж өнөөдөр бид гурван хүүхэдтэйгээ амьдарч байна. Гэр бүлийн хүнийг маань Б.Туул гэдэг.
• Нам бус хүмүүсийг УИХ-д дэвшүүлсэн нь Үндсэн хуулийн өөрчлөлтийг “амилуулах” парламентыг салбар бүрийн төлөөллөөс бүрдүүлэх үндсэн зорилготой. Энэ нь ч МАН-ын шинэчлэлд тустай. Гаргасан шийдвэртээ би үргэлж баяртай байдаг.

3. ЕС: Та бүхэн одоогийнхоороо явах боломжгүй гэж үзвэл би ёс зүйн хариуцлага хүлээж огцрох нь зөв сонголт болно. Гэхдээ улс орны эрх ашгийг бодолцон одоогийн хамтралыг үргэлжүүлбэл би итгэл хүлээн ажлаа үргэлжлүүлнэ.

4. Бага хурлаас гарах анхнаасаа бэлдсэн “Хамтарсан засгийн газрын гэрээгээ зөрчсөн улстөрийн намыг засгаас гаргаж, ШИНЭЭР Засгийн газар байгуулахыг дэмжих үү?” гэсэн саналын томьёоллоор санал хураалт явуулах нь ЕС-ыг огцруулах тухай байсан тул Бага хурлын гишүүдийн дийлэнх нь эсэргүүцсэн. Нэгэнт заал анх бичигдсэн саналын томьёоллоор санал хураалт явахааргүй болсон тул завсарлага зарлав.

5. Завсарлагын эцэст ЕС "та бүхнээс тавьсан гэрээг зөрчсөн намыг гаргах эсэхээр санал хураагаад өнөөдрийн хурлыг хаая. Та бүхний гаргасан саналын үр дүнгээс хамаараад миний хувьд хамтарсан намуудтайгаа асуудлаа зөвшилцөж, дараагийн шийдвэрээ гаргая” гэж хэлээд, 61% нь үндсэндээ гэрээ зөрчсөн намыг гаргахыг дэмжсэн гэсэн үг.