Чингэлтэй дүүрэг орон сууц хорооллууд дундах найман байршилд 26 ухаалаг хогийн сав суурилуулж эхэлжээ. Эдгээр хогийн сав нь жирийн хогийн сав биш бөгөөд далд хэлбэрээр байрлах ухаалаг хогийн сав аж. 

Тодруулбал, ухаалаг далд хогийн саванд зөвхөн чиптэй иргэд хогоо хаяж, дүүрсэн тохиолдолд программаар ТҮК рүү мэдээлэл илгээдэг тул хог ачихад зарцуулдаг үргүй зардлыг хэмнэх боломж бүрдэж байгаа юм.

Мөн хог хаягдлаас гарах үнэрийг гадагш орчинд нэвтрүүлэхгүй, багтаамж сайтай, хэрэглэхэд хялбар аж.

Одоогоор гурван байршлын суурилуулалт, гадна тохижилтын ажил дуусаад байна. Цаашид үе шаттайгаар хороолол дундах ил задгай хогийн цэгүүдийг солино гэдгийг дүүргийн удирдлагууд мэдээлсэн юм.

Оршин суугчид хэрэглэж хэвшсэний дараа далд хогийн савнууддаа эхний ээлжид дахин боловсруулах боломжтой хогоо ангилж хийдэг болгоно. Ангилсан хаягдлыг ачихдаа нягтаршуулаад үйлдвэрт аваачихад бэлэн болгох зохицуулалт руу орохоор төлөвлөжээ. 

Чингэлтэй дүүргийн далд хогийн цэг суурилуулж байгаа 8 байршлын мэдээлэл:

1. ЧД, 1-р хороо, Их дэлгүүрийн зүүн талд 1, 3, 12, 13 дугаар байрны дунд талбайд 2 ширхэг
2. ЧД, 1-р хороо, Мөнгөн завъяагийн ард буюу 5-10 дугаар байрны дунд 4 ширхэг
3. ЧД, 3-р хороо, Peace tower зүүн хойно, 11, 12 дугаар байрны дунд 3 ширхэг
4. ЧД, 3-р хороо, Их дэлгүүрийн баруун талд 15,16 дугаар байрны дунд 3 ширхэг
5. ЧД, 4-р хороо, 74 дүгээр цэцэрлэгийн урд буюу 30А байрны ард 4 ширхэг
6. ЧД, 6-р хороо, Баянбүрдийн тойрог явах замд буюу Лааганы зам дагуу 62-р байр 4 ширхэг
7. ЧД, 6-р хороо, 5 дугаар сургуулийн зүүн талд 44 дүгээр байр 4 ширхэг
8. ЧД, 10-р хороо, 39 дүгээр сургуулиас хойшоо явах замд Шинэчлэл хороололд 2 ширхгийг тус тус суурилуулж байна.

Суурилуулалт, тохижилтын ажил дуусахаар ойр орчмын оршин суугчдад тухайн хогийн савны чипийг өгөх юм.