Монгол Улсын Ерөнхий аудитор Д.Загджавын бүрэн эрхийн хугацаа ирэх тавдугаар сарын 09-ны өдөр дуусна. Тэгвэл түүний оронд УУХҮЯ-ны Төрийн нарийн бичгийн дарга асан С.Магнайсүрэнг томилох саналыг өчигдөр УИХ-ын дарга Д.Амарбаясгалан гаргасан байна. Хуулийн дагуу Ерөнхий аудиторыг УИХ-ын дарга санал болгож, нэр дэвшигчийн сонсголыг зохион байгуулах учиртай. 

Тэгвэл уг сонсгол ирэх сарын 7-нд болох аж. 

С.Магнайсүрэнгийн хувьд олон жил Барилга, хот байгуулалтын яамны Төрийн нарийн бичгийн даргын албыг хашсан. Мөн өмнө нь УИХ-ын Тамгын газрын даргын нарийн бичгийн даргаар ажиллаж байсан төрийн албаны арвин туршлагатай нэгэн. Тэрбээр 27 жил төрийн албанд ажиллаж байгаа бөгөөд 2015-2023 онд хуучнаар БХБЯ-ны ТНБД-аар ажиллаж байсан.

Ажилласан байдал:

• 1997-1999 онд “Улаанбаатар-Эрдэм” дээд сургуульд багш, тэнхимийн эрхлэгч,
• 1999-2000 онд УИХ-ын Тамгын газарт УИХ-ын гишүүний туслах,
• 2000-2005 онд УИХ-ын тамгын газарт зөвлөх,
• 2005-2006 онд СБД-ийн ЗДТГ-т Тамгын газрын дарга,
• 2006-2007 онд ХХААЯ-нд Сайдын зөвлөх,
• 2007-2008 онд Сангийн яаманд Газрын дарга,
• 2008-2013 онд УИХ-ын Тамгын газарт Нарийн бичгийн дарга,
• 2015 оны хоёрдугаар сараас Хөдөлмөрийн яамны Төрийн нарийн бичгийн дарга,
• 2015 оны аравдугаар сараас Барилга, хот байгуулалтын яамны Төрийн нарийн бичгийн дарга,
• 2023 оны есдүгээр сараас Уул уурхай хүнд үйлдвэрийн яам одоогийн Аж үйлдвэр, эрдэс баялгийн яамны Төрийн нарийн бичгийн даргаар ажилласан.