Санхүүгийн зохицуулах хорооноос ТОП-100 аж ахуй нэгжид шалгарсан компани санхүүжилт татах зорилгоор бирж болон биржийн бус зах зээлд үнэт цаас гаргахад тавигдах шалгуурыг багасгаж, хялбар, шуурхай байдлаар бүртгэхээр болжээ. Тухайлбал, 

• Нийтэд санал болгон хувьцаа гаргахад хөрөнгийн үнэлгээ хийлгэхийг шаардахгүй байх
• Нийтэд санал болгон гаргаж буй хувьцаа, бондыг бүртгүүлэх тухай хүсэлтийг хялбаршуулсан горимоор хянаж, бүртгэх эсэх шийдвэрийг ажлын 10 хоногийн дотор гаргах
• Нээлттэй болон хаалттай хүрээнд нэг жил хугацаатай 5 тэрбум төгрөг хүртэлх үнийн дүнтэй бонд гаргахад аливаа барьцаа, батлан даалт шаардахгүй байх, андөррайтөрийн компанитай заавал гэрээ байгуулахыг шаардахгүй байх. 

Ингэснээр дотоодын томоохон компаниудад хөрөнгийн зах зээлд үнэт цаас гаргах зохицуулалтын таатай орчин бүрдэхийн зэрэгцээ компанийн үйл ажиллагаа өргөжих, ашигт ажиллагаа нэмэгдэх, компанийн засаглал сайжрах, улмаар гадаад, дотоодын зах зээлээс санхүүжилт татахад давуу тал үүсэхээс гадна хөрөнгийн зах зээлийн нийт эдийн засагт үзүүлэх нөлөө нэмэгдэнэ гэж Санхүүгийн зохицуулах хорооноос мэдээллээ.