Засгийн газраас дулааны үнийг тавдугаар сарын 16-наас нэмнэ гэж байсан ч гуравдугаар сарын 12-ны ээлжит хуралдаанаараа түр хойшлуулах шийдвэр гаргасан билээ.

Тэгвэл Эрчим хүчний зохицуулах хорооноос энэхүү шийдвэрийн хүрээнд дулааны үнэ тарифын өөрчлөлтийг 2025 оныг дуустал хугацаанд хойшлуулах шийдвэр гаргажээ.

Дулааны үнийг дараах байдлаар нэмэх гэж байсан юм. Үүнд, 

• Аж ахуйн нэгжийн тариф 73 хувиар,
• Айл өрхийн тариф 100 хувиар нэмэгдэхээр тооцоололтой байсан. 

Энэ хүрээнд айл өрхийн хэрэгцээний халуун усны үнийг зуны улиралд хүнээр тооцвол 2806 төгрөг байгааг 5612 төгрөг болох байсан билээ. Харин халаалтын тариф нь одоогийн байдлаар

• Улаанбаатар хотод 1 мкв нь 506 төгрөг,
• Дархан, Эрдэнэт, Чойбалсан хотод 1 мкв нь 648 төгрөг 
• Бусад аймгийн төвүүдэд 1 мкв нь 1024 төгрөг хүрээд байна. 

Тэгэхээр Улаанбаатарын хувьд хамгийн хямд байгаа юм. Тиймээс үүнийг бусад аймгуудын түвшинд хүргэж, 1012 төгрөг болгохоор тооцоолж байсан. Өөрөөр хэлбэл, халаалтын үнэ нь

• Улаанбаатар хотод 100 хувиар
• Дархан, Эрдэнэт, Чойбалсан хотод 56 хувиар нэмэгдэх байсан юм. Энэхүү нэмэгдэл ийнхүү 2025 оны 12 дугаар сарын 31-ний өдрийг дуустал хойшилж байна.