УИХ-ын Эдийн засгийн байнгын хороогоор Монголбанкны Хяналтын зөвлөлийн үйл ажиллагааны талаарх мэдээллийг сонслоо. Хяналтын зөвлөлөөс УИХ-д ОУВС-ийн 2022 оны тайланг үндэслэн Монголбанкны үйл ажиллагаанд тулгамдаж буй асуудал, санал зөвлөмжийг танилцуулсныг тоймлон хүргэе. Үүнд, 

• Төсвийн шинжтэй үйл ажиллагааг санхүүжүүлж байна.
• Хяналтын хараат бус бүтэц дутмаг байна. 
• Төв банкны ерөнхийлөгчийг хуулийн хугацаа дуусаагүй байхад нь солих явдал түгээмэл байна. Эдгээр нь Төв банкны хараат бус байдлыг эргэн харах шаардлагатай сануулж буй юм.

Түүнчлэн

• Монголбанкны хуримтлагдсан алдагдал 2023 оны байдлаар 7.4 их наяд төгрөгт хүрчээ.
• Монголбанкны пассив нь актив хөрөнгөөс хэтэрсэн тохиолдолд Засгийн газар үнэт цаас гаргах замаар уг зөрүүг нөхөх асуудлыг Улсын Их Хурал шийдвэрлэнэ гэсэн хуулийн заалт хэрэгжихгүй байна. 
• 1925 онд гүйлгээнд гараад 1938 онд буцаан төвлөрүүлсэн зэс, мөнгөн зоосны асуудал байна. Энэхүү зооснуудыг 2018 онд дахин үнэлж, Эрдэнэсийн сандаа буюу өөрийн актив хөрөнгөд бүртгэсэн. Уг зооснуудыг Эрдэнэсийн санд бүртгэгдсэн нь нотлох баримтаар баталгаажаагүй, хөндлөнгийн аудитаар шалгуулаагүй байна.
• 2012-2023 онд 11 жил дараалан алдагдалтай ажилласан. 
• Таван жилд нэг удаа хийдэг зарим хөрөнгийн үнэлгээг хийлгээгүй байна. 
• Монголбанк орон тоо ихтэй ч Дотоод аудитын газар, Эрсдэлийн удирдлагын алба зэрэг үндсэн чиг үүргийн газруудад тогтмол 2-3 хүн дутуу ажиллаж байна.